FORISH UZUMZORLARINING SHUHRATI TIKLANMOQDA
Forishning qora kishmish uzumi va ushbu uzumdan tayyorlangan qora soyaki mayizlarining tengi yo‘q. Qora kishmish uzumlari shirinligi, tabiiy tozaligi bilan dovrug‘ taratgan.
O‘zbekiston Respublikasi Prezidentining 2023-yil 3-avgustdagi “2023 – 2026-yillarda uzumchilik va vinochilik sohasini yanada rivojlantirishga qaratilgan chora-tadbirlar to‘g‘risida”gi PQ-260-sonli qarori qabul qilingandan keyin Forish tumanida uzumchilik sohasini yanada rivojlantirish, yangi uzumzorlar barpo etish borasida ishlar amalga oshirilmoqda.
Forish tumani “Egizbuloq” mahallasida faoliyat yuritayotgan tadbirkor Kamol Xolmatov rahbarlik qilayotgan “Buyuk Javohir timsoli” mas’uliyati cheklangan jamiyati a’zolari Forishning qora kishmish uzumlarini yetishtirishni ko‘paytirish maqsadida yangi loyihaga qo‘l urib, 43,6 gektar yerda uzumzor barpo etishdi.
Toklarni sug‘orish uchun tomchilatib sug‘orish texnologiyasi joriy etildi. Yangi loyiha hisobiga 10 ta doimiy va 50 ta mavsumiy ish o‘rinlari yaratildi.
Bugungi kunda toklar hosilga kirib, uzum g‘arq pishgan. Pishib yetilgan uzumlar peshma-pesh ichki bozorga yo‘naltirilmoqda. Hosildorlik esa gektariga 45 sentnerdan yuqorini tashkil etayapti.
Forish tuman hokimligi axborot xizmati.
